dil ki baat

 

Bahut  kuch kehna hai tumse lekin samajh nhi aa rha kahu kaise. Dil mey jitni bhi baatein hai tumse judi sab tumse share karni hai. Shuruat hee dekho kitne apnepan aur hak se hui ki tumhe aap se tum kehne lagi. Har bat dil ki tumse share karti hu isiliye nhi ki tum pehle se hee sab jaante ho balki isiliye tumse kuch chupana apne aap ko dhokha dene jaisa lagta hai. Inn aankhon mey ek ajeeb si kashish hai, ek jaadu hai ki saamne wala chahkar bhi jhooth nhi bol paata. Aisi kitni hee baatein hai jo dil tumse kehna chahta hai, apni har sachchai byaan karna chahta hai bina kisi darr, ghabrahat ya hichkichahat ke kyuki bharosa hai usse tumpar sabse zyada.

Meri zindagi  toh  tum ho lekin meri duniya mere maa baap hai. Mere apno ki list mey sabse upar naam unhee ka hai tumse bhi pehle. Bahut pyaar aur respect hai unke liye isiliye unhe khone ka darr bhi tumhse khone se kahi zyada hai. Ek baar ke liye tumse muh mod sakti hu lekin unse nhi. Apno ko khone ke isee darr ke kaaran kitni hee baar tumse lad padti hu, naraz ho jaati hu. Hak nhi koi phir bhi jaane kyu tumpar apna hak samajhti hu. Kyuki shayad yakeen hota hai ki tum mujhe mana loge. Zindagi ke kisi mod par hum phir mil jayenge. Apni sapno ki duniya mey kabhi apno ko toh kabhi anjaano tak ko jagah de baithti hu. Tumhe apne saamne na paakar bhi tumhe apne paas hee mehsus karti hu. Har ghadi har pal baat nhi hoti tumse aur na hee tumhara khayal rehta hai lekin jab  rehta hai toh koi aur baat zehen mey nhi reh paati.

Kabhi sochna bhool bhi jau tumhe toh tum phir kisi na kisi roop mey, kisi baat mey khud hee saamne aa jaate ho. Kabhi dost bankar toh kabhi ek saathi bankar. Haatho ki pakad kabhi mujhse chutne lagti hai toh usse phir se usi majbuti se thaam lete ho. Chahe jaise bhi mood mey hu main…khushi mey dukh mey, gusse mey, kisi pareshaani ya uljhan mey dil mey naam tumhara hee aata hai. Har mood mey har bat tumse hee baatne ko mann karta hai. Saamne hote ho toh aksar undekha kar deti hu lekin jaise hee aankhon se ojhal hote hai toh nigahe tumhe hee dhundne lagti hai. Kaisa rishta hai kaisa judaav hai  tumse mujhe samajh  nhi aata. Kyu hai aur kabse hai yeh bhi samajh nhi aata. Par kuch toh hai  jo sirf tumhee se hai aur kisi se nhi, kyuki dil aisa mehsus aur kisi ke saath nhi karta.